الكوارع 

فى الوقت اللى بدور فيه عن معنى كلمه كوارع بالالمانى. وافتكر فرشه حلل الكوارع فى العيد ادام بابا. ورائحه الكوارع ممتلئه بها الانوف والملابس. وفى نفس الوقت المفترض انى بعمل دبلومه مش عارفه عن منهجها اى حاجه.و المفروض انى امتحن كمان اسبوعين. والشغل اد كده فوق دماغى. فى الوقت دة بأه جاه عبادى يسألنى عن خططى المستقبليه فى الادب وطموحاتى ولالاللالا. وطبعا علشان اجوبه اكتشفت انى لازم افكر. وده شئ لوحده محتاج تفكير لانى بألى كده فتره طويله بعمل الحاجات اللى تتطلب منى من غير ما افكر انا عايزه ايه دلوقتى (فى المرحله الراهنه على رأي بتوع السياسه واكتشفت كمان انهم غلبانين اوى كل يوم بيعدو يعملوا خطط خمسيه وبتاع على الرغم انى فرد واحد بس مش عارفه اخرج من دقه التوم والكوارع, يا جماعه دا تهريج, المفروض ما نطلبش من الناس فوق طاقتهم, ازاى يعملوا خطط خمسيه لبلد, اهلها مش عارفين يعملوا خطه ليوم واحد) فعلا انا باعمل ايه غير البحث عن مفردات لترجمه وجبه الكوارع الفرعونيه الى الالمانيه. يعنى اكيد لازم يكون فى حاجات تانيه اهم. وفى انشغالى دة. انا نسيت كل حاجه وبعمل اللى يتطلب منى واتحولت لترس على رلأى كافكا مع الاعتدار لعبادى المتحدث الرسمى باسم كافكا فى المجموعه. بس مش معقول كده بت موزه زيى (اه موزه ايه مش عاجبكم والا ايه ) تفكر فى الجزء المهم ده من حياتها…. فى الكوارع. ده انا حتى مابحبهاش. وافتكرت قصه لكاتب مش فاكراه وده موضوع تانى, قرر انه يركب قطر ويمشى من البلد والشغل ويعمل اللى هو عايزه علشان هو خلاص جاب بنزين.طيب الحل ده قشطه اوى. بس ماينفعش اعمله فى الواقع. تخيلوا كده بنت تركب قطر وتسيب شغلها و بيتها وتطفش. اهلها هيعملوا ايه, الناس هيقولوا ايه, (اهل الحاره هيقولوا ايه على رأى طارق لطفى فى المسلسل العبقرى بتاع الفنانه المبتكره دائما فيفي عبده , مش فاكره اسم المسلسل كان ايه ,الست صبريه , الست نكديه مش فاكره بالظبط, هى كانت طول المسلسل بتضحى علشان اولادها ولما كبروا كل واحد اداها صابونه محترمه  وسابوها لوحدها فى البيت وتوصلت فى الاخر لقيمه المسلسل والعظه لما قررت تشغل نفسها فى خدمه المجتمع, المهم دة مش موضوعنا,  موضوعنا كان لما اكتشف طارق لطفى زواج اخته عرفى فى المسلسل كان تعليقه الاول بعدما وضع يديه على رأسه لهول الفاجعه وارتسمت على ملامحه امارات التفكير العميق, قال : اهل الحاره هيقولوا ايه) وانا من ساعتها بصراحه قدرت دور الحاره و قدرها وحتى لو ماكنتش ساكنه فى حاره, اكيد اى حاره وخلاص اهلها هيقولوا اى حاجه لما اطفش واسيب البيت واقرر بطريقه رومانسيه جدا زى كاتب القصه اياها انى امشى.الخلاصه ان لا مفر من الكوارع.ومش بس كده لاااا دة انا لازم كمان مصدقش زى الهبله كل حاجه اقراها واعمل بأه زى العيال الصغيرين واقلدها… انا عايزه من ده يا حزنبل. وبعد تفكير عميق جدا زى طارق لطفى فى الموقف اياه) قررت ان الوضع يجب ان يبقى كما هو عليه. الجميل بأه فى القرار ده انى توصلتله  بمحض ارادتى ( والنبى ما حد يسخنى يا جماعه ويقول لا)  وتوصلت ان حتى لو ركبت دماغى وعملت كده عايزه تمويل وعايزه اعرف انا حروح فين. وأخيرا بابا وماما هيصعبوا عليه.وبردك هارجع زى الجزمه للكوارع. طب وليه…. خلينا فى الكوارع                

اللإ حزنبل يعنى ايه  ؟؟؟؟؟؟