كوارع كمان وكمان

بناء على رغبه الجماهير الغفيره قررت ان اتنحى عن منصبى (لا ياربى مش هو ده اللى عايزه اقوله) اه افتكرت. فى الفتره الى فاتت ديه بعد اعلان وثيقه الكوارع جاتلى استفسارات كتيره وكرم اخلاقى بيحتم انى ارد عليها.

اولا: ده مش انجليزى (هذه لغتنا) على رأى طه حسين. واتغاظوا يا حاسدين انا     حلوه وصغيره

ثانيا:  هو انا مش قولت محدش يطلعها فى دماغى,  اه عيله وستين عيله كمان . بس ممكن على الاقل أحلم. واتخيل كده نفسى هربانه على موتسيكل كده ورا الموز بتاعى وشعري بيطييييييير والجبال ورانا والعصافير بس ايه ده. الحلم ده ليه عليه شويه تحفظات. اولا : انا اخاف اركب موتسيكل خليها توكتوك.

ثانيا: احنا ماعندناش جبال فوقيها عصافير.

ثالثا: انا كده هيجيلى ضربه شمس.وماتبقاش رحله الهروب, تبقى رحله الصعود الى المسوى الاخير.

اذن نقدر نتخيل دلوقتى مشهد الهروب.انا ركبت التوكتوك واكيد الموز بتاعى ده اللى عنده التوكتوك ضارب برينكول وعامل دماغ صراصير.وماشين بقه بالتوكتوك وانا التباع بتاعه علشان مش هنطلع الصحرا اذن هنفضل فى الزحمه. وافضل الم انا بقى فى انصاص على اربع والاشيا تبقى معدن. هو ده الكلام.

ايه القرف ده, انتى اتجنينتى ولا ايه .كده سوفاج خالص.

أنتى مالك انتى.

ازاى يعنى. مالى فى جيبى يعنى.

يا جماعه ياجماعه, هدوا اخلاقكوا شويه. أنا مش عارفه انام. ربنا يخدك انتى وهيه فى يوم واحد يارب فى حادثه التوكتوك.

ثالثا: الناس اللى كانوا السبب فى كل ده منهم له بقي,انا مش هقول حاجه.

ورابعا: بالنسبه لكونى موزه ده مش سؤال, دي حقيقه واقعه.  وده خلانيى افكر فى الاساليب اللى لازم أتخذها بعد كده,علشان الناس اللى مابتقدرش الجوهره اللى زيي. مثلا هبقى اكتب على التيشيرت يا ناس يا شر كفايه قر.

خامسا: بالنسبه لكلمه موزه. الكلمه استخدمت اول مره فى فيلم فى الاربعينات مش فاكره اسمه لااسماعيل ياسين وزينات صدقى, ايام لما كان مفيش ممثلات غيرها, فأضطر يقولها يا موزه وامره لله. واللى مش مصدق ممكن يراجع افلام اسماعيل ياسين ويتأكد من صحه كلامى وعلى العموم مش هيغلب, فأسماعيل ياسين     ماعملش غير 1000 فيلم بس!!!!!. وانا من رأيى ان زينات صدقى كانت موزه والله ده كفايه روحها وكتاكيتها

وده يجرنا لمشكله تانيه كبيره اوى وهى هل تكتب كلمه موزه ام مزه. بما أن الكلمه قديمه زى ما قولت من ايام اسماعيل ياسين. وبما ان المجمع غرقان لغايه دلوقتى فى تعريف كلمه ساندويتش فى صفحتين. فما بالكوا بقى بكلمه موزه. وبما ان مفيش اى معلومات فمن الممكن انى استهبل واكتبها كل مره بالطريقه اللى تعجبنى وبمزاجى يا معلم.

لكن رأيى الذى لا يستهان به بحكم تجربتى الطويله, ان كلمه موز تتكتب بالواو مش من غيرها علشان من غيرها (مز) يبقى معناها مر او مامرر. هذا ولله اعلم 

وبالنسبه لوصفه الكوارع: فكك بقى ده انتوا قرفتونى , هو مش كفايه اسم المقال كوارع كمان وكمان, محدش يطلب حاجه تانى, لما نروح البيت حوريكوووووووا